Barbón reclamó güei la conexón del alta ferroviaria ente’l norte d’España y Francia al traviés del corredor atlánticu. Adrián Barbón, qu’esta mañana asistió nel monesteriu de Santo Toribio de Llébana al entamu del Añu Xubilar Llebaniegu en compañía del so homólogu cántabru, Miguel Ángel Revilla, aportunó en que ye necesariu esixir al país vecín “que cumpla los sos compromisos con España”. “De nada sirve facer inversiones equí si nun siguen en Francia”, precisó.
Na so visita a Cantabria, Barbón tamién punxo en valor los llazos d’hermandá” que se texeron nesta llexislatura ente les dos comunidaes a nivel institucional y que dexaron defender postures conxuntes n’ámbitos tan relevantes como’l financiamientu autonómicu, la defensa del territoriu o la cultura. “Somos dos comunidaes uniprovinciales nun marcu nel qu’hai enforma en xuegu y la nuesa alianza beneficiónos a les dos”, destacó.
Nel planu cultural resaltó la puesta en marcha del Camín de los Santuarios, nel que s’implicaron dambes comunidaes pa realzar les conexones históriques ente Santo Toribio y Cuadonga y la nacencia del Reinu d’Asturies al rodiu Pelayo, “una figura que xune a cántabros y ástures”.
