El presidente d’Asturies, Adrián Barbón, va esixir compensaciones al Ministeriu de Tresportes énte’l retrasu de la entrada en serviciu de los nuevos trenes Avril d’alta velocidá, que van dexar cubrir el viaxe ente Uviéu y Madrid pola variante de Payares en menos de trés hores.
Barbón anunció nel plenu de la Xunta Xeneral que’l conseyeru de Fomentu, Alejandro Calvo, va axuntase güei con responsables del ministeriu col fin de treslladar el fondu malestar del Gobiernu asturianu por esti retrasu y reclamar contrapartidas pa desaniciar los inconvenientes causaos. “Asturies ta farta, y yo tamién, de los incumplimientos de los socesivos ministerios de tresportes y por eso esiximos y alzamos la voz en defensa de los intereses d’Asturies”, destacó. “Pidimos rigor, seriedá y certidumes, y tamién compensaciones; y Asturies, cuando tien qu’enfrentase a quien seya, anque seya a un Gobiernu de nuesu mesmu signu, va facer. Porque pa esti gobiernu, Asturies ye lo primero”, añedió.
Barbón refirióse tamién nel mesmu plenu parllamentariu al procesu de transición enerxética y garantizó que va haber consensu nel so gobiernu pa regular la implantación de los parques eólicos na comunidá, en que’l so marcu apuesta por aumentar la potencia de los yá esistentes, “siempres se va tener en cuenta la voluntá municipal» y va esixise a les empreses que restauren aquellos centros que dexen de producir.
Al respective de ArcelorMittal, repitió la esixencia de que cumpla los sos compromisos para descarbonizar la so actividá siderúrxica n’Asturies, ”una negociación na que ta’l Ministeriu d’Industria» porque tanto’l Gobiernu d’España como’l d’Asturies comparten el plenu convencimiento» de que nun se puede arrenunciar a caltener na comunidá’l procesu de siderurxa integral.
