Adrián Barbón dio una rueda de prensa na tarde de güei pa analizar la evolución del andanciu n’Asturies y valorar les midíes a tomar pol executivu asturianu. La principal novedá ye que va retrasar una selmana más la decisión de reabrir el pequeñu comerciu, que sía que non, va ser condicionada.

El comerciu minorista n’Asturies va siguir zarráu mientres polo menos una selmana más dada la negativa evolución del coronavirus. Nos últimos díes  Xixón presenta una llixera estabilización, Avilés presenta un enclín a la baxa y n’Uviéu xube.

Les principales midíes que señaló’l presidente son delles: sigue’l zarru d’hostelería y comerciu, amplíense los zarros perimetrales nos trés principales núcleos: Uviéu, Xixón y Avilés, amás de nuevos n’otros conceyos. Van estudiase cribados en zones básiques de salú con tases d’incidencia altes, más usu de test de antígenos na atención primaria, incrementu de cames UCI en venti pa mitigar la presión y reforzar les residencies.

Con estes midíes Barbón apela a la esperanza pa detener esta segunda fola magar que reconoz el hartazgu y la frustración de los ciudadanos. Insiste tamién na importancia de reducir la movilidá y los contactos al empar que pide a les fuerces de seguridá que seyan estrictos en facer cumplir les midíes.