El presidente Adrián Barbón, anunció esti domingu que Lydia Espina (Villaviciosa, 1974) va relevar a Carmen Suárez (Xixón, 1953) al mandu de la Conseyería d’Educación. Espina, actual directora xeneral de Planificación ya Infraestructures Educatives, va asumir la so nueva responsabilidá’l próximu xueves, 29 de xunetu. Ente les sos prioridaes, el xefe del Gobiernu destaca la necesidá de consiguir “mayor conexón ente formación y empléu” pa responder a la demanda d’un mercáu llaboral en continuu tresformamientu.

El presidente tomó posesión del so cargu’l 20 de xunetu de 2019. Los conseyeros y conseyeres fixéronlo cinco díes depués. Güei cúmplense, por tanto, dos años esactos. Carmen Suárez Suárez yá taba xubilada cuando asumió’l so puestu. Doctora n’Hestoria pola Universidá d’Uviéu y llicenciada en Filosofía y Ciencies de la Educación, dedicara tola so vida llaboral a la educación pública como profesora de secundaria ya inspectora.

Barbón destacó’l trabayu, dedicación y compromisu” de la conseyera nestos años, especialmente difíciles: “foi un periodu especialmente duru y complexu, marcáu pola pandemia, nel que se cometieron aciertos y erros, pero nel que se demostró qu’Asturies cunta con un sistema educativu públicu robustu y capaz d’encarar circunstancies estraordinariamente adverses”.

El compromisu colos servicios públicos ye ún de los rasgos más acusaos del Gobiernu d’Asturies. La educación, enfatizó’l presidente, ye “clave pa garantizar la imprescindible igualdá d’oportunidaes” y fomentar la equidá. Tamién ha ser quien d’aadaptar la ufierta formativa a les necesidaes llaborales pa contribuyir al amenorgamientu del desempléu xuvenil. Esi ye, precisamente, ún de los oxetivos qu’enuncia Barbón: “avanzar hacia una mayor conexón ente formación y empléu pa poder encarar los importantes retos que supón un mercáu llaboral en tresformamientu pol impactu de la revolución tecnolóxica y el protagonismu de la innovación”. El presidente destaca que la nueva conseyera va tener tol so respaldu “pa facer frente a los desafíos que tenemos per delantre, y va facer dende’l diálogu, l’alcuerdu y la busca de lo meyor pa los intereses d’Asturies”.

Este ye’l segundu cambéu relevante nel gobiernu de Barbón. El primeru tuvo llugar va un añu y afectó a la so estructura competencial. El vicepresidente Juan Cofiño asumió Función Pública pa lliderar la reforma de l’Alministración. Al tiempu, Alejandro Calvo fíxose cargu de la xestión de les infraestructures nuna nueva ya inédita Conseyería de Mediu Rural y Cohesión Territorial.

 

La nueva conseyera

Lydia Espina López ye funcionaria de carrera del cuerpu de maestros dende 2016. Llicenciada en Filoloxía Inglesa pola Universidá de Salamanca, darréu llogró’l grau de maestra n’Educación Primaria. A lo llargo de la so trayectoria, exerció como maestra d’Infantil y Primaria y como profesora d’Inglés en diversos centros educativos asturianos. Dende xunetu de 2019 dirixía’l Colexu Públicu Montevil, de Xixón. Antes d’incorporase en febreru a la Conseyería d’Educación como directora xeneral de Planificación ya Infraestructures Educatives ocupaba la Conceyalía d’Educación, Cultura y Deporte del Conceyu de Villaviciosa.