Adrián Barbón, presidente del Principáu, repitió el so compromisu de llograr una Asturies hiperconectada, tantu de forma física “cola llegada de l’AVE”, como de manera tecnolóxica, “al traviés de les nueves redes de comunicación».
Adrián Barbón participó esta mañana na presentación del proyectu Conéctate35, una iniciativa de Hispasat qu’ufierta soluciones p’aportar a internet d’alta velocidada al traviés de satélite nes zones rurales. Con esti propósitu, la empresa pon a disposición de los operadores minoristes una plataforma de recursos pa la prestación d’un serviciu d’accesu a la rede disponible en tol territoriu nacional. Esta alternativa facilita que, naquelles árees xeográfiques a les que resulte imposible llevar cable de fibra, xeneralmente pola so complexa orografía, pueda aportase a banda ancha a 100 megabits per segundu (Mbp).
Mientres la so intervención, el xefe del Executivu valoró les meyores que se dieron nos últimos años pa garantizar l’accesu a internet d’alta velocidá de tola población y aseguró que’l desenvolvimientu de la tecnoloxía satelital va dexar algamar l’oxetivu d’una comunidá hiperconectada. “Ellí onde se vea’l cielu, vamos tener cobertoria. Vamos a una Asturies hiperconectada”, aseguró.
Los planes d’espansión de la banda ancha executaos nos últimos años dexaron ufiertar conectividá al 97% de la población asturiana, un porcentaxe que se va ampliar cola tecnoloxía satelital pa llegar tamién a los rincones de xeografía más complexa. «Tenemos de faer pedagoxía pa que la ciudadanía sepa qu’hai alternativa a la fibra óptica tradicional y que l’accesu a internet vía satélite ye de la mesma calidá», precisó Barbón.
