El presidente d’Asturies, Adrián Barbón, pidió la collaboración de los centros asturianos y les cases d’Asturies en Madrid «p’atraer talentu a Asturies y asitiar a la comunidá nel mapa y en positivu, ya qu’Asturies ye una tierra de futuru».
Barbón caltuvo un alcuentru con responsables de los centros asturianos de Madrid y Tres Cantos y les cases d’Asturies de Guadarrama y Alcalá de Henares.
El xefe del Executivu destacó la importancia de les cases rexonales, «que constitúin una rede d’embaxaes en tol mundu» y avanzó qu’unu de los propósitos del so gobiernu ye impulsar la collaboración y el trabayu con estes instituciones. Nesti sen, anunció que pretende caltener alcuentros con cierta periodicidad colos centros asturianos de tol mundu. Coles mesmes, avanzó qu’en marzu va celebrar una xunta colos centros asturianos de la Comunidá de Madrid.
