El presidente Adrián Barbón, presentó na Xunta Xeneral un decálogu d’oxetivos al Ministeriu de Tresportes y Movilidá Sostenible pa que recupere la so credibilidá n’Asturies. El líder del Executivu esplicó que al ministeriu píde-y “fechos, non palabres”. Barbón añedió que “pa les comunicaciones asturianes llegó’l tiempu de les realidaes; el de les promeses yá caducó”. El presidente definió esti conxuntu d’oxetivos como “l’horizonte escontra’l qu’hai que caminar en materia d’infraestructures”.
La llista numberada inclúi los siguientes puntos:
- Apostar pola alta velocidá y el corredor atlánticu Cumplimientu del plan de cercaníes
- Rematar les integraciones ferroviaries
- Recuperar l’autopista del mar
- Nuevu sistema de bonificaciones nel Güerna
- Presentar una solución para la zona oeste de Xixón
- Ameyorar les comunicaciones del suroccidente
- Licitar l’enllaz de Carbayeda
- Integrar Renfe nel Consorciu de Tresportes d’Asturies
- Sofitar el desenvolvimientu d’Asturies como polu loxísticu del Cantábricu
Respectu al vial de Xove, Adrián Barbón esixó que se depuren responsabilidaes y repitió’l so refugu al proyectu alternativu presentáu por Tresportes: “Los que respondieron por ese proyectu son los mesmos que tán detrás de les obres de l’autopista en Serín, por eso pido que se depuren responsabilidaes. Tamién les qu’esistan na Delegación de Gobiernu”. Al respective de la propuesta del ministeriu, el presidente espresó “Un non atayante del Gobiernu d’Asturies, que ta al llau de los vecinos. Ese proyectu nun nos val”.
El xefe del Executivu, que repitió que pal so gobiernu “Asturies ye lo primero”, repasó la llista de ministros de los postreros venti años y aseguró que toos ellos incumplieron los sos compromisos cola comunidá. “Por eso”, añedió, “nós podemos dicir que los intereses d’Asturies son la nuesa prioridá, porque enfrentamos a ministros de nuesu mesmu signu políticu, cosa qu’ustedes (en referencia al Partíu Popular) nunca fixeron”. Precisamente, sobre l’actitú del principal partíu de la oposición n’Asturies cuando gobierna’l PP en Madrid, Barbón amestó que “el silenciu siempres foi la so bandera. Inclusive tando na oposición fueron incapaces de defender los intereses d’Asturies”.
