Adrián Barbón anunció güei que’l Gobiernu d’Asturies ta dispuestu a estudiar el refuerzu del personal, de los protocolos y del presupuestu de los centros d’acoyimientu de menores. El presidente negóse en redondu a conceder carta de naturaleza a les agresiones sexuales a menores tutelaes, cometíes por “miserables, asquerosos, dexeneraos morales”. Cola mesma rotundidá, anunció que l’Executivu va demostrar con fechos la so “tolerancia cero” énte esti tipu de sucesos.
La Policía Nacional informó díes tras de la detención de 12 individuos, acusaos de prostituyir a cinco menores tutelaes. Con esti telón de fondu, el xefe del gobiernu contestó na Xunta Xeneral una entruga del voceru de Foro, Adrián Pumares, sobre’l funcionamientu de los centros d’acoyida. Barbón caltuvo un tonu contundente a lo llargo de tola so respuesta, mesmo pa pidir que se culpabilice a los agresores –nun aforró calificativos pa definilos- como pa negar qu’estos fechos puedan normalizase.
“El gobiernu nun miró escontra otru llau”, sorrayó. Como exemplu de la reacción del Executivu citó la ronda de xuntes empecipiada pola conseyera de Derechos Sociales y Bienestar, Marta del Arco, quien tamién solicitó por mesma iniciativa la so comparecencia nel parlamentu. Cuando rematen estos alcuentros, que van incluyir a la Fiscalía, va ser el momentu de concretar les midíes que s’adopten.
El presidente adelantró, sicasí, que’l gobiernu ta dispuestu a considerar les trés víes de trabayu plantegaes por Pumares: reforzar el presupuestu, revisar los protocolos y aumentar el personal de los centros d’acoyimientu. Tamién contrastó les propuestes constructives del diputáu de Foro cola actitú de la estrema derecha, que “nun tien nin idea y piensa que los centros d’acoyimientu son cárceles”.
