Adrián Barbón aprovechó’l sábadu la so última comparecencia pública mientres l’estáu d’alarma p’anunciar una reestructuración del gobiernu. El vicepresidente Juan Cofiño va asumir les competencies sobre función pública y Alejandro Calvo, hasta agora titular de Desenvolvimientu Rural, Agroganadería y Pesca, va asumir tamién el cargu tamién l’area d’infraestructures. L’oxetivu d’estos cambeos, que se van faer efectivos nos vinientes díes, ye reforzar la respuesta del Gobiernu asturianu a los desafíos acentuaos pola pandemia, como la reforma de l’Alministración autonómica. El númberu de conseyeríes va siguir siendo’l mesmu: diez.
Barbón enllazó’l cambéu coles reflexones amenaes pola pandemia. “Camudónos a toos, tamién a mi. Sale un presidente distintu al qu’entró”, confesó. La crisis fizo evidente la necesidá d’encarar “una reforma bien amplia” de l’Alministración autonómica pa que respuenda a les necesidaes del sieglu XXI. Esi cometíu de primer orde va recayer en Juan Cofiño, quien tamién asumió’l lideralgu de la comisión delegada p’asuntos económicos y la reconstrucción. La nueva cartera del vicepresidente llamaráse Conseyería d’Alministración Autonómica, Mediu Ambiente y Cambéu Climáticu.
L’andanciu tamién aumentó la importancia del mediu rural, “que sale revalorizáu”. El presidente sorrayó la relevancia de les infraestructures pa la cohesión del territoriu y aprovechar meyor el potencial de les zones rurales. D’esta manera, Alejandro Calvo pasa a encargase tamién de la política de comunicaciones. La resultancia ye un nuevu departamentu que se va titular Conseyería de Mediu Rural y Cohesión Social.
Homenaxe
La reestructuración del Executivu nun foi l’únicu mensaxe del presidente. Barbón fixo balance del estáu d’alarma, qu’empezó con 142 casos activos de coronavirus, 2.000 pruebes PCR y dos finaos y terminó con 2.435 casos, más de 200.000 pruebes y 366 finaos con coronavirus. El presidente confirmó que na primera quincena de xunetu inaugurará un memorial vivu n’homenaxe a les víctimes. «Va valir pa recordanos lo asocedío y que sía tamién un mensaxe de futuru pa les próximes xeneraciones».
L’impactu económicu de la pandemia foi otru asuntu encetáu pol xefe del Gobiernu. Resaltó la importancia del fondu de compensación de 16.000 millones aprobáu pol Conseyu de Ministros. Al aceptar dalgunes de les propuestes plantegaes pol Executivu del Principáu, Asturies va pasar a recibir 280 millones, 50 más de los envaloraos cola propuesta inicial. Pal presidente, ye lóxicu qu’esi fondu conceda más recursos a les comunidaes onde’l virus tuvo mayor incidencia. “Nun camudo un hospitalizáu nin un ingresáu en UCI por un euru más”, afirmó.
