El presidente del Gobiernu asturianu, Adrián Barbón, aseguró esti martes que’l so Executivu va tomar les decisiones oportunes «por contundentes y dures que sían» pa garantizar la salú pública y frenar la estensión del coronavirus. «L’alternativa ye acabar toos confinaos dientro d’unos meses y eso ye lo que nun queremos de nenguna manera», alvirtió.
Nesti sentíu, el xefe del Executivu precisó que «gobernar significa decidir» y que, nun contestu sanitariu tan complexu como l’actual, eso implica «tomar decisiones bien difíciles». Sicasí, aportunó en que les midíes que se fueron adoptando «nun son gratuites» y defendió l’actuación del Gobiernu asturianu «pa evitar la situación que yá tán viviendo otres comunidaes». «Que naide tenga nenguna dulda de que la nuesa la prioridá ye la salú. Ensin salú nun hai nada de too lo demás. Si nun somos capaces de garantizar la salú pública, si nun somos capaces de controlar los biltos, d’evitar que’l virus espándase y que tenga una crecedera esponencial, esi sería’l peor de los daños que podríamos faer a la economía», añadió.
Barbón fizo estes declaraciones enantes de visitar la esposición Humanos! 6.000.000 años d’evolución, onde encamentó a la ciudadanía a esfrutar de les distintes alternatives d’ociu y diversión ensin escaecer les midíes de seguridá. «Podemos esfrutar, podemos compartir y podemos conocer siempres qu’usemos mázcaru, caltengamos la distancia de seguridá y l’hixene de manos, aplicando siempres el sentíu común», añadió.
