Asturies va disponer a partir del próximu llunes, 11 de marzu, de 2.000 billetes selmanales d’alta velocidá a 25 euros pa viaxar a Madrid dende’l 1 d’abril. Per otra parte, les promociones de superprecios que se van poner en marcha cola llegada de los nuevos trenes Avril van enllargase hasta’l branu de 2025. Estos son dalgunos de los compromisos que’l secretariu d’Estáu de Tresportes y Movilidá Sostenible, José Antonio Santano, adquirió col conseyeru de Fomentu, Cooperación Local y Prevención de Quemes, Alejandro Calvo, na xunta que caltuvieron en Madrid. Mientres l’alcuentru, Tresportes esplicó al gobiernu los motivos de los retrasos na puesta en serviciu de la segunda fase d’alta velocidá a Asturies.
Na xunta, a la qu’asistió tamién el viceconseyeru d’Infraestructures y Movilidá, Jorge García, avanzóse en cuestiones que dexen meyores estructurales de la movilidá y la conectividad multimodal na comunidá. “Lo más importante ye que la llegada de l’alta velocidá tresforme toa la nuesa rede ferroviaria y dexe sofitar a un sistema de tresporte públicu intermodal, que p’Asturies ye fundamental, un elementu de cohesión y una oportunidá de desenvolvimientu p’amplies contornes d’Asturies”, señaló’l conseyeru.
“Los precios amenorgaos son una ventaya para l’usuariu, pero tamién tienen que ser una forma de consolidar la ruta d’Asturies”, añedió’l titular de Fomentu. Nesti sentíu, destacó que van contribuyir a la desestacionalización turística, al enllargase hasta’l branu de 2025, y que van dexar emprestar especial atención a la nueva ruta con Avilés, que va facilitar l’accesu a l’alta velocidá al occidente d’Asturies.
El Principáu y Tresportes trabayen nun alcuerdu pa reforzar la intermodalidad nes estaciones de la rede de cercaníes y alta velocidá, al traviés d’un alcuerdu específicu de corresponsabilidad que dexe financiar actuaciones de meyora nes estaciones ferroviaries y la so redolada. D’esta miente, búscase facilitar l’accesu en tresporte públicu y habilitar o ameyorar aparcamientos para los usuarios del ferrocarril, favoreciendo la llegada dende redolaes rurales y metropolitanos a los servicios de cercaníes y llarga distancia en vehículu particular, na llínea de los alcuerdos que se van desenvolver para les estaciones de La Pola (L.lena) y Mieres.
El Ministeriu de Tresporte tamién se comprometió col Executivu autonómicu a caltener un intercambiu permanente d’información sobro la puesta en serviciu de los nuevos trenes Avril, que s’espera sía lo más rápida posible, asegurando siempres el cumplimientu de los cánones de seguridá y fiabilidá.
Amás, el secretariu d’Estáu informó de que Renfe ta estudiando los pidimientos que’l Principáu treslladó en relación cola declaración d’obligación de serviciu públicu y nel marcu de la nueva Llei de Movilidá Sostenible. Dambes alministraciones coincidieron en que l’oxetivu final ten de ser emprestar el meyor serviciu a la ciudadanía.
