El momentu más esperáu por tolos ‘bombis’ dende va dellos meses desvelóse. Boombastic Asturies publica la última meyora del so cartelu pa la nueva edición que se va celebrar los díes 18, 19 y 20 de xunetu nel espectacular recintu de Llamorgal, en Llanera. A escasos meses de qu’arranque’l festival más multitudinariu d’Asturies, yá son más de 50.000 entraes les vendíes y tánse escosando los últimos abonos.
Los archiconocidos Manuel Turizo y Black Eyed Peas van ser cabeza de cartelu nel mayor espectáculu de música urbana del país. L’astru colombianu, Turizo, va facer cimblar a tolos ‘bombis’ el xueves para siguir rompiendo esquemes dientro de lo urbano. Mientres que el toque más hiphoperu del festival, va poner el sábadu la banda estadounidense ganadora de seis Grammys, Black Eyed Peas. Dicir el nome d’estos dos cabeces de cartelu ye referise a collaboraciones esitoses, cifres récord de reproducciones y canciones número unu en toles llistes; de too ello vamos poder esfrutar na tercer edición de Boombastic Asturies de la qu’entá queden sorpreses por desvelar.
Artistes como Saiko, Yandel, Rels B, JC Reyes, Nicki Nicole, Natos y Waor, Lola Índigo, Cruz Cafuné, Dani Fernández, Dei V, Omar Montes, Ovy On The Drums, Funzo & Baby Loud, Truenu o Recycled J van tar nel próximu Boombastic Asturies xunto a más de 80 artistes, amás de munches sorpreses y novedaes por afayar pa siguir viviendo la esperiencia Boombastic al cien per cien.
Confirmaes tán tamién les closing parties d’anguaño: el dj y influencer gallegu Michenlo va llevar a Boombastic Asturies el so Blue Party, una nueche llena de música y espectáculu. Nun podía faltar nesta edición la fiesta más llinda del mundu, Bresh, l’eventu que bate récords internacionalmente y el zarru d’anguaño va dir de la mano de Boom Boom Party, onde se dan cita los meyores artistes nacionales de la música urbana. Boombastic ye muncho más qu’un festival. Amás de música, ye toa una esperiencia. Con distintes zones de descansu y glamping, una amplia gama d’opciones gastronómiques, amás de munches más actividaes y sorpreses que van facer de Boombastic el festival de moda d’esti branu.
