Efectivos de Bomberos del Serviciu d’Emerxencies del Principáu d’Asturies (SEPA) y efectivos de GREIM de la Guardia Civil busquen dende ayeri nueche a un home, de nacionalidá alemana, despaecíu cuando realizaba una ruta de monte ente Poncebos y l’abellugu de la Terenosa, en Cabrales.
Mientres la nueche, el Grupu de Rescate del SEPA al pie de la Unidá de Drones rastrexaron tola zona del Cares y la zona baxa hasta la metá y les canales de Amuesa y Cambureru hasta Les Mayaes. La Unidá Drones tuvo trabayando en parte de la zona del Cares y la canal del Texu y pela so parte los dos efectivos del GREIM realizaron la ruta de Poncebos a Bulnes ensin que se realizara nengún afayu.
A primer hora d’esta mañana volver a entamar la busca conxunta y per parte del SEPA movilizóse al Grupu de Rescate col helicópteru medicalizáu y per tierra, a la Unidá de Drones, a la Unidá Canina y a un Xefe de Zona que se va poder al frente del Puestu de Mandu Avanzáu que’l so camión tamién s’instaló na redoma. L’helicópteru de Bomberos d’Asturies se turnará, si la meteoroloxía dexa col de la Guardia Civil. Nel dispositivu tamién siguen participando efectivos del GREIM.
El Centru de Coordinación d’Emerxencies del 112 Asturies recibió l’avisu a les 20.34 hores d’ayeri domingu. Na llamada, realizada por un familiar del sumíu, indicó que l’home saliera a los once de la mañana pa realizar una ruta ente l’abelugu de La Terenosa y Poncebos y llegar al coche, onde habíen quedáu, sobre los cinco de la tarde. El so teléfonu nun daba señal.
