Efectivos de Bomberos del Serviciu d’Emerxencies d’Asturies (SEPA) cola collaboración de de la Guardia Civil busquen dende ayeri nueche a un varón desaparecíu na contorna de la sablera de Gulpiyuri, en Llanes.
A primer hora d’esta mañana volvió a reactivase’l dispositivu, que tien al frente al xefe de zona oriental de Bomberos d’Asturies. Na contorna d’esti arenal instalaráse’l Puestu de Mandu Avanzáu del SEPA. Na busca per aire van dise turnando l’helicópteru de la Guardia Civil, el de Bomberos d’Asturies y el Helimer de Salvamentu Marítimu. Per mar movilizó la ERIE (Equipu de Respuesta inmediata) Acuática de Cruz Roja y una embarcación de la Guardia Civil y per tierra activáronse efectivos de bomberos de Llanes y Cangues d’Onís, Grupu de Rescate, Unidá de Drones y Unidá Canina del SEPA amás d’axentes de la Guardería de Mediu Natural del Principáu y voluntarios de l’agrupación de voluntarios de Protección Civil de Llanes. La Guardia Civil tamién caltien axentes nel llugar.
El Centru de Coordinación d’Emerxencies del 112 Asturies recibió l’avisu a les 21.34 hores d’ayeri martes. Na llamada un familiar indicaba que nun sabíen nada del desaparecíu dende la tarde. Darréu alcontrábense’l so vehículu nel parking de la sablera.
La Sala 112 del SEPA movilizó a efectivos de bomberos del parque de Llanes, al Grupu de Rescate per tierra, a la Unidá de Drones y Unidá Canina ya informó de lo asocedío a la Guardia Civil y a Salvamentu Marítimu qu’unvió’l Helimer a la zona.
Parte del personal retiró a les sos respectives bases al rodiu de los dos de la madrugada y na zona permanecieron efectivos de parque llaniscu.
