A primer hora ta previstu que se vuelva a entamar el dispositivu de busca d’una persona sumida ayeri nel mar, frente a el bufones de Santiuste, en Llanes. Nel rastrexu participen Bomberos del Serviciu d’Emerxencies del Principáu d’Asturies (SEPA), l’Equipu de Respuesta Inmediata d’Emerxencia (ERIE) acuática de Cruz Roja, Guardia Civil y Salvamentu Marítimu.
Pa la busca nel mar tantu Guardia Civil como Salvamentu Marítimu y Cruz Roja tienen previstu movilizar distintes embarcaciones y per aire, si la meteoroloxía nun la torga, turnarán trés helicópteros empecipiando’l rastrexu’l Helimer de Salvamentu Marítimu, siguíu de l’aeronave de la Guardia Civil y l’helicópteru del SEPA.
Ayeri tamién se movilizó pal rastrexu los GEAS (Grupu Especial d’Actividaes Subacuátiques) de la Guardia Civil y l’Unidá de Drones del SEPA.
El Centru de Coordinación d’Emerxencies del 112 Asturies recibió l’avisu a les 11.02 hores d’ayeri xueves. Na llamada, realizada por unes persones que taben pescando na zona, indicaben que taben viendo a un home vocinglando nel mar, pidiendo ayuda.
La Sala 112 del SEPA movilizo a Bomberos del SEPA con base nel parque de Llanes y paralelamente activó al Grupu de Rescate col helicópteru medicalizáu. La borrina torgó que l’aeronave pudiera desapegar polo que se sollertó a Salvamentu Marítimu col Helimer amás de la embarcación Salvamar que yá activara pa la zona. Tamién s’informó a la Guardia Civil qu’unvió una patrulla a la zona y darréu a los GEAS.
Los equipos, a los que se sumaron con posterioridá, tanto la Unidá de Drones del SEPA como la ERIE acuática de Cruz Roja y el Xefe de Zona del Oriente, al frente del dispositivu, permanecieron na zona hasta última hora d’ayeri ensin llograr resultancies.
