Campaña contra l’adicción al xuegu

La iniciativa tien por oxetivu prevenir y informar sobre la realidá de los xuegos d’azar

0
210

El Gobiernu asturianu va siguir a partir d’esti mes d’avientu col espardimientu de la campaña Tu ganes. La iniciativa tien por oxetivu prevenir y informar, concretamente a los más mozos, sobre la realidá de los xuegos d’azar y les conductes de riesgu alredor d’esta actividá.

La campaña, promovida pol Conseyu de la Mocedá y desenvuelta pola Dirección Xeneral de Patrimoniu y Xuegu, enmárcase dientro de la execución del Programa de Prevención de la Ludopatía del Principáu d’Asturies (2018-2020). Na primer metá del añu difundiéronse una partida de vídeos informativos y agora empieza una campaña de cartelería que se va distribuyir per dellos conceyos y que ta protagonizada por Alberto Coto, reconocíu espertu en cálculu.

El programa de Prevención de la Ludopatía, únicu n’España, detalla la estratexa d’actuación en materia de prevención y incluye un plan de midíes que s’articula alredor de cinco ámbitos d’actuación: formación y información; educación; control y inspección; atención sanitaria y inclusión social.