L’Ayuntamientu de Cangas yá cunta con delles zones de conexón wifi pública, que dan serviciu de baldre a vecinos y visitantes. Ye una instalación que promovió’l Conceyu cangués, con una sovención de 15.000 euros de la Unión Europea. Trátase de la iniciativa Wifi4EU, cola que la Comisión Europea quier promover la conectividá n’espacios públicos en toa Europa. En Cangas instaláronse trés puntos d’accesu esteriores, que la so conexón s’atopa en fase de pruebes, y que, “dexa l’accesu a Internet nel parque del Fuexu, na plaza de la Oliva y na plaza Conde Toreno, con cobertoria en cais y zones aledañas como’l parque del Mineru o’l Prao del Molín”, esplicó l’alcalde de Cangas, José Víctor Rodríguez, quien detalló que se trata d’un accesu a Internet gratuitu y d’alta velocidá”. Una tecnoloxía que tamién se podrá esfrutar nel interior de la Casa Consistorial o nes distintes estancies de Casa de Cultura ‘Palacio de Omaña’. L’alcalde de Cangas, José Víctor Rodríguez, anunció qu’esta actuación va ampliase llueu col proyectu ‘Cangas, Comerciu Natural’, que tamién contempla nuevos puntos de conexón wifi.
“Les conexones a Internet son fundamentales nun territoriu rural como’l de nueso”, dixo Rodríguez, quien recordó recién actuaciones como la implantación del 5G na zona de Mieldes y instalóse fibra óptica na villa, que los sos trabayos siguen desenvolviéndose para llegar a nueves zones no que resta de llexislatura, “tamos impulsando proyectos con distintes operadores por que eso sía asina”, matizó.
L’Ayuntamientu de Cangas aspira a convertise nuna Smart City, una villa intelixente, por ello invirtió 16.915 euros en poner en marcha una rede de comunicación LoRaWAN, que se controla y xestiona al traviés de la plataforma Smart City IoTsens del grupu Gimeno. Trátase d’una rede que yá cunta con dos dispositivos que toma un radiu de cobertoria de dos kilómetros y que va dexar unviar los datos procedentes de distintos sensores, coles mires de facilitar la vida al ciudadanu. Ente otres acciones el Consistoriu cangués yá instaló sensores nos estacionamientos pa persones con movilidá amenorgada, que va dexar controlar el nivel d’ocupación de los mesmos. Trátase d’una actuación piloto, que se va estender a otres zones de estacionamientu de la villa, y que’l so nivel d’ocupación va dexar a la ciudadanía controlar al traviés d’una aplicación que va desenvolver el mesmu Conceyu.
Esta rede yá cunta colos dispositivos de control de la calidá del aire, el soníu y el CO2, que se controlen al traviés de la plataforma Smart City IoTsens. Esta tecnoloxía ta dotada colos sistemes más avanzaos, lo que va dexar nel futuru’l control del consumu eléctricu, la monitorización de la rede d’agua o l’accesu de les empreses y comercios pa facilitar la vienta y la comercialización.
