L’Ayuntamiento de Cangas del Narcea, con cargu a los fondos mineros del Plan del Carbón 2013-2018, ta acabante de sacar a llicitación, por un importe de 42.305 euros (51.189 euros IVA incluyíu), l’adquisición de lluminaries LED p’ameyorar la eficiencia enerxética nes zones industriales de La Riela, el polígonu de Tubongu y el mercáu de ganáu de La Imera. En total van adquirise 357 lluminaries que van permitir llevar a cabo un aforru na factura de la lluz, al tiempo que s’ameyora la calidá llumínica d’estes trés zones del conceyu.

“Les lluminaries LED consumen ente seis y siete veces menos qu’una bombilla incandescente”, recordó l’alcalde de Cangas del Narcea, José Víctor Rodríguez, quien detalló qu’esti tipu de lluminaries, “tienen una mayor vida y polo tanto suponen un aforru pa les arques municipales”. El plieuo de condiciones de la llicitación, contempla una garantía nes lluminaries de hasta diez años, con una execución pa la implantación de les mesmes d’un mes en caún de los trés llotes.

Una inversión que, “ye un claro apoyu pa xenerar empléu y caltener el texíu empresarial del nuestru conceyu, que tamién va vese beneficiáu cola implantación de la fibra óptica enel polígonu de Tubongu, cuya obra yá tenemos en llicitación”, dixo Rodríguez. Unos trabayos que van beneficiar a una treintena d’empreses, con una inversión a cargu de los fondos mineros de 16.754 euros (20.272 euros IVA incluido) y cuya llicitación va resolvese nos prósimos díes, tres vencer el pasáu martes la fecha de presentación d’ufiertes, pa llevar a cabu los trabayos, cuya execución va llevase a cabo a lo llargo d’un mes. “Ye una obra mui importante yá que se consigue que’l texíu empresarial seya más competitivu y los empresarios puedan ufiertar los sos productos al traviés d’Internet, con una conexón d’alta calidá”, destacó’l rexidor.