Dende principios d’añu’l Conceyu de Cangas yá forma parte de la plataforma web ‘Vente a vivir a un pueblu’. Un proyectu que surdió arriendes de la pandemia coles mires de fomentar la vida nel mundu rural y poder atraer a nueves vecinos al conceyu. “Dende’l Conceyu promovimos la integración nesta plataforma porque Cangas ye una villa que cunta con grandes posibilidaes a la hora de ser escoyida como nueva residencia”, esplicó la conceyala de Desenvolvimientu Local, Turismu, Facienda y Réxime Interior de Cangas, Begoña Cueto Blanco.
La plataforma tien cinco perfiles bien definíos d’usuarios: urbanitas que quieren teletrabayar, aquellos que busquen una manera de vida más sana y económica, persones que busquen segunda residencia, persones d’otros países d’Europa y mozos que quieren desafiase. Cangas yá recibió más d’una decena de consultes de families con fíos y pareyes comenenciudes en conocer más detalles, especialmente de vivienda y trabayu, pa valorar treslladase de forma definitiva al conceyu.
Cada vez son más les persones que busquen un pueblu pa vivir pero nun saben cómo faelo, per ónde empezar nin ónde atopar información. Esta plataforma, que lideró arriendes de la pandemia’l periodista Ramón Pradería, pon a disposición todo los servicios colos que cunta’l conceyu de Cangas. Facer por aciu fiches informatives que respuenden a les grandes duldes que toos podemos tener a la de valorar un cambéu definitivu de residencia y forma de vida: qué servicios de sanidá y educación hai, cuántu cuesta la vivienda, qué ufiertes de trabayu hai. Amás infórmase d’otros servicios que s’amuesen al traviés d’un vídeu de 17 minutos, que va facilitar a los futuros habitantes faese una idea clara de cómo ye Cangas y tolos servicios colos que cunta.
La plataforma web cunta con bolses de trabayu y vivienda, lo que facilita l’asentamientu nel conceyu, d’aquelles persones que tean buscando un pueblu para vivir. La plataforma ta a disposición de tolos vecinos que deseyen xubir conteníu a les bolses de vivienda y trabayu. Namás van tener que rexistrase como usuarios, facilitando una sinerxa por aquellos comenenciudos quedar a vivir definitivamente en Cangas. Pela so parte, el Consistoriu Cangués, tamién va facilitar les ufiertes públiques d’empléu que surdan na contorna, según aquelles ufiertes que se publiquen nel Serviciu Públicu d’Empléu. Amás, la Oficina Nueva de Cangas va ayudar a cualesquier vecín que lu deseye a xubir les sos ufiertes d’empléu o vivienda a la plataforma.
