Del 27 al 31 d’ochobre, de 19:00 a 21:30 h nel Parque de la Reguerala, los visitantes van tener la oportunidá d’esperimentar una aventura máxica y espeluznante nun parque encantáu que cobra vida dempués de 250 años. Esti eventu, coorganizáu pola Asociación de Pequeños Empresarios de Cangas del Narcea (APESA), la JL d’Hostelería de Cangas del Narcea y el Conceyu de Cangas del Narcea, tien como oxetivu principal fomentar el consumu local y promover la participación de la comunidá nuna actividá única que se va convertir nuna tradición pa la villa n’años vinientes.
Hallowgreen ufierta a los visitantes la oportunidá de somorguiase nun mundu de maxa y misteriu, onde la hestoria y la fantasía enxaréyense pa crear una esperiencia inolvidable. La entrada al parque temáticu va tar disponible puramente por aciu la realización de compres en cualesquier de los establecimientos acomuñaos a APESA o la JL d’Hostelería de Cangas.
Con esti eventu, Cangas da un pasu al futuru, sentando les bases pa convertise na primer villa rural con un parque temáticu viviente pal añu 2024. Esta iniciativa promete non solo entretener y emocionar a los asistentes, sinón tamién impulsar el desenvolvimientu local y promover la maxa de Halloween d’una manera única.
El Parque va tener continuidá’l sábadu 28 d’ochobre a les 19:00 h con un pasucais de Hallowgreen peles cais de Cangas del Narcea pa neños y mayores, nel que va collaborar l’Asociación San Juan Bailón, xunto cola Asociación de Muyeres de Oubacho, qu’ellaboraron una muñeca Catrina xigante de 6 metros de diámetru, amás de la collaboración del taller d’empléu FUCOMI, que fixeron de manera manual espaciu pa bruxes, pantasmes y efectos visuales pal parque temáticu.
