Cangas del Narcea va esfrutar del espectáculu ECO By Flock Drone Art mientres la próxima fin de selmana de’l 8 de xunu. Un show únicu de 200 drones que van volar na villa de Cangas faciendo realidá’l suañu de los vecinos y amigos de Cangas, que llograron ganar esti espectáculu gracies al sofitu masivu nun concursu de redes sociales desenvueltu pola empresa executora del espectáculu.
Programada pal 8 de xunu a les 22:30 hores, l’espectáculu va contemplar el desenvolvimientu del espectáculu denomináu ECO, y que va llevar a cabu la empresa FLOCK FRONE ART. Esti show promete ser el mayor eventu de drones enxamás realizáu nuna redolada de monte n’Asturies, ufiertando una esperiencia visual incomparable nun marcu de suañu como ye’l valle que protexe la villa de Cangas del Narcea.
La empresa describe’l show ECO como una reflexón pero tamién un llamamientu, un reclamu pero tamién una hestoria. Una curtia reflexón sobre’l bellu llugar que pisamos, alendamos y vivimos el día ente día, onde figures de más de 100 metros d’envergadura van allumar el cielu representando’l relatu que xira al rodiu al planeta azul. L’espectáculu va disponer d’una zona habilitada pal públicu asistente, que va poder esfrutar del mesmu dende’l centru neurálxicu de la villa canguesa, el denomináu Prao del Molín, zona habitual de tirada de la famosa Descarga de Cangas.
Dientro del programa d’actividaes d’esa fin de selmana, llueu’l Conceyu de Cangas del Narcea y APESA van anunciar nueves acciones que van acompañar la Nueche de Drones, faciendo del conceyu un referente cómo destín turísticu la fin de selmana de’l 7 y 8 de xunu.
