El Gobiernu d’Asturies va poner en marcha a lo llargo del mes de marzu cuatro llinies exprés d’autobús p’ameyorar la conexón con Uviéu dende Cangues d’Onís, Cangas del Narcea, Llanes y A Veiga. Les nueves rutes van encurtiar tiempos de viaxe, al amenorgar el númberu de paraes entemedies, y van facilitar la conexón de les nales cola capital asturiana, principalmente a primer hora y en puntos estratéxicos como l’Hospital Universitariu de Central d’Asturies (HUCA).
Los nuevos servicios respuenden a les demandes de vecinos y conceyos y enmárquense nel apueste del Gobiernu d’Asturies por ameyorar la comunicación de les ales por aciu la movilidá sostenible.
• Occidente
Nel casu de la conexón dende A Veiga, l’autobús va salir a les 5:45 hores y va facer paraes en Tapia, Navia y L.luarca llegando a Uviéu a les 8:00 hores. D’esta forma, el tiempu de viaxe amenorga ente venti minutos y una hora y cuartu en comparanza col restu de servicios. La vuelta dende Uviéu va salir a les 14:45 hores. En total, A Veiga va pasar a cuntar con siete conexones diaries cola capital asturiana, de llunes a vienres.
El CTA tamién va poder en marcha una llinia directa ente Uviéu y l’Hospital de Xarrio que va salir de la capital a les 9:00 hores y va llegar al centru sanitariu a les 10:40, parando en L.luarca y Navia. La vuelta va partir dende l’hospital a les 13:05 hores.
La nueva ruta exprés dende Cangas va salir a les 15:45 hores y va llegar a Uviéu a les 17:35, en parando en Tinéu, La Espina y Salas. El trayectu inversu va arrancar a les 13:00 hores dende la estación d’autobuses. Dende la so entrada en serviciu, Cangas va cuntar con ocho frecuencies diaries, de llunes a vienres, cola capital.
• Oriente
El serviciu exprés dende Llanes va salir a les 6:00 hores y va parar en Ribeseya y Villaviciosa. Va Llegar al HUCA a les 7:30 y diez minutos dempués, a la estación d’autobuses de la capital. La vuelta escontra Llanes va partir al mediudía. En total, la villa oriental va cuntar con seis conexones diaries con Uviéu los díes llaborables.
El postreru d’estos nuevos servicios va partir de Cangues d’Onís a les 6:15 hores y va llegar a la capital a les 7:40, incluyendo una parada previa nel HUCA. Esti autobús semidirecto namás va realizar paraes en Les Arriondes, L’Infiestu y Nava. El regresu va realizase a les 13:00 hores. En total, va haber 13 frecuencies al día ente la ciudá canguesa y Uviéu y los horarios van afacer na temporada braniza.
