La conseyera de Derechos Sociales y Bienestar, Melania Álvarez, entregó güei’l Premiu «José Lorca» a la Promoción y Defensa de los Derechos de la Infancia a Carlos Becedóniz, exdirector del Institutu Asturianu pa l’Atención Integral a la Infancia y les Families.
La conseyera destacó’l llabor desenvueltu por Becedóniz mientres los sos cuasi cuarenta años de carrera, desque empezó la so andadura profesional en 1984 como educador nel Centru Xuvenil de Sograndio y hasta la so xubilación, en mayu d’anguaño, como director del Institutu d’Infancia. La so candidatura llogró l’apoyu de tolos miembros del xuráu del gallardón, que llega anguaño la so 14.ª edición.
Álvarez destacó la so “implicación, vocación de serviciu y compromisu”, asina como’l papel fundamental” de Becedóniz na transición a la llei reguladora de la responsabilidá penal de los menores del 2000, qu’estableció la llende nos 14 años pa esixir responsabilidá sancionadora (hasta entós la edá de referencia pa ello yeren los 12 años). “Trátase d’una llei con un espíritu educador y educativo, que prima l’interés del menor na flexible adopción xudicial de la midida más aparente en cada casu”, valoró la titular de Derechos Sociales.
Carlos Becedóniz llicencióse n’Historia na Universidá d’Uviéu en 1980 y la so carrera profesional tuvo siempre vinculada a la promoción de los derechos de menores y adolescentes d’Asturies. Amás de trabayar como educador en Sograndio, formó parte del equipu técnicu de centros del área del menor, onde foi xefe d’área de 1993 a 1995, y como técnicu nel antiguu Institutu Asturianu d’Atención Social a la Infancia, Families y Adolescencia. Del 2006 hasta 2019 coordinó l’Observatoriu de la Infancia y l’Adolescencia y dende setiembre d’esi añu hasta la so xubilación dirixió l’Institutu Asturianu pa l’Atención Integral a la Infancia y les Families.
