El Centru de Coordinación d’Emerxencies del 112 Asturies contabiliza a estes hores una decena d’incidentes rellacionaos col episodiu de fenómenos costeros y fuertes vientos rexistráu n’Asturies. Trátase, fundamentalmente, retiraes d’elementos peligrosos, cayida d’árboles y llimpieces, toes de calter menor.
Dende’l SEPA encamiéntase a la población estremar los precuros y nun averase a cantiles, paseos marítimos y zones peligroses onde les fuertes raches de vientu pueden provocar cayíes y na mariña pueden resultar arrastraos por un güelpe de mar. Nos desplazamientos per carretera empresten especial atención énte la posible presencia de torgues na vía; na so vivienda revise los anclaxes de los elementos afitaos nel esterior del edificiu y si tien que salir empreste especial atención énte’l peligru de desprendimientos de cornises o otros materiales que puedan cayer d’altor.
Recuerden que según AEMET l’avisu naranxa por costeros pa la nuesa mariña va enllargase hasta les 09.00 hores del vienres, día 3, cuando se va convertir n’avisu de nivel coloráu hasta les 15.00 hores del domingu, día 5, que vuelve ser naranxa.
Respectu al vientu, según les previsiones, amplíase l’avisu mariellu por vientos d’hasta 90 quilómetros/hora na Cordelera y Picos d’Europa dende les 00.00 hores del sábadu, día 4, hasta les 12.00 hores d’esi mesmu día, cuando se tresforma n’avisu de nivel naranxa con vientos d’hasta 110 kilómetru per hora hasta les doce de la nueche. Amás, nel suroccidente, tol sábadu, prevense vientos d’hasta 90 quilómetros/hora.
