La rede autonómica, pública y gratuita de Les Escuelines cuenta yá col compromisu d’adhesión de 43 conceyos. La Conseyería d’Educación consiguió güei’l respaldu de cinco conceyos del suroccidente asturianu: Cangas, Tinéu, Degaña, Balmonte y Somiedu.
La conseyera d’Educación, Lydia Espina, axuntóse esta mañana na capital canguesa colos alcaldes de Balmonte, Gilberto Alonso; Somiedu, Belarmino Fernández, y Cangas, José Luis Fontaniella; l’alcaldesa de Tinéu, Montserrat Fernández, y la conceyala d’Educación de Tinéu, Jimena Fernández, y el teniente d’alcaldía de Degaña, Luciano Villanueva, pa esplicar los detalles de la futura llei, responder a les sos consultes y consiguir información sobre’l funcionamientu y la estructura de les sos escueles municipales.
Trés d’esos conceyos yá tienen una escuela municipal de 0 a 3 años en funcionamientu: Balmonte, que nun tien llista d’espera, y Cangas y Tinéu, con llista d’espera. Les trés escueles municipales van integrase na rede autonómica a partir 2025. Amás, en Cangas y Tinéu preve l’apertura de nueves unidaes dientro de la Fase II.
Tocantes a Degaña, Asturies va construyir una escuelina na primer fase de la rede nun edificiu independiente na parcela próxima al colexu. El costu ye de 47.175 euros. A lo último, Somiedu ta pendiente de l’apertura inminente de la escuela de 0 a 3 años, que la so obra financia con fondos europeos MRR.
Esta foi la primer xunta celebrada tres l’apertura del periodu d’almisión d’alumnáu pal próximu cursu 2024/2025, qu’empezó ayeri y qu’inclúi per primer vegada la rede autonómica de Les Escuelines. El procedimientu va ser el mesmu tanto pa les escueles municipales como pa les d’Asturies hasta que se produza la plena integración. La conseyera aportunó enforma a los mandatarios pa que-y dean la máxima publicidá al procesu d’almisión del alumnáu de 0 a 3 años.
La conseyera destacó’l clima de collaboración y entendimientu que ta atopando nestes xuntes territoriales colos responsables municipales. Tamién recordó que Les Escuelines va suponer la medría de la escolarización a edaes tempranes, que va ayudar a afitar población y va ameyorar la calidá educativa.
