Cinco persones, cuatro muyeres y un varón, resultaron mancaos de diversa considerancia nun accidente de tráficu en Corvera. Según los datos facilitaos pol Serviciu d’Atención Médica Urxente (SAMU) les persones mancaes, que fueron treslladaes al Hospital de San Agustín, son cuatro muyeres, una de 57 años y otra de 40 años, mancaes graves; y otra muyer de 57 años y una de 33 años, mancaes de diversa considerancia. Un varón de 25 años tamién resultó mancáu y por cuenta de más pruebes y hasta nueva valoración médica’l so pronósticu ye reserváu.
El Centru de Coordinación d’Emerxencies recibió l’avisu a les 19:16 hores. Nel avisu indicóse que se produxera un choque ente dos turismos y un varón nun podía salir d’unu de los coches. De momentu movilizóse a los cinco efectivos de Bomberos del Serviciu d’Emerxencies del Principáu d’Asturies (SEPA) con base nel parque avilesín, que se treslladaron col furgón multisocorro y el vehículu primera salida.
Una vegada na zona los bomberos comprobaron que’l conductor, únicu ocupante d’unu de los vehículos accidentaos, nun podía salir del mesmu, La dotación retiró la puerta del llau del conductor, y n’inmovilizando al varón mancáu asitiándo-y el collarín, estrayéronlu del interior del coche col ferno-ked. Nel segundu coche viaxaben cuatro muyeres.
Los bomberos tamién realizaron xeres de llimpieza de la calzada. Los efectivos dieron per rematada la intervención a la so llegada a base, a les 21:27 hores. La sala del 112 del SEPA informó del sucesu a la Guardia Civil, al serviciu de caltenimientu de la calzada y al SAMU qu’activó la UVI Móvil d’Avilés, l’ambulancia convencional col equipu médicu d’Atención Primaria de Corvera, y dos ambulancies de soporte vital básicu.
