Cinco persones resultaron mancaes nun accidente de tráficu nel AS-17, ente los puntos kilométricos 9 y 10, entre Cancienes y Solís en Corvera. Según los datos facilitaos pol Serviciu d’Atención Médica Urxente (SAMU) un varón foi treslladáu al Hospital Universitariu Central d’Asturies (HUCA), mientres les otres cuatro persones fueron treslladaes al Hospital San Agustín.
El Centru de Coordinación d’Emerxencies recibió l’avisu a les 17:12 hores. Na llamada indicóse que se produxera un choque ente trés turismos y nún había una persona que nun podía salir. Nel momentu, movilizóse a seis efectivos de Bomberos del Serviciu d’Emerxencies del Principáu d’Asturies (SEPA), con base nel parque avilesín, que se treslladaron col vehículu primera salida y el furgón multisocorru.
Una vegada nel llugar, los bomberos retiraron la puerta del llau del conductor d’un turismu, nel que taba atrapáu’l so únicu ocupante, y en retirando los asientos fixeron la so estracción pela parte trasera del coche. La maniobra realizóse tres ser atendíu l’afectáu pol equipu médicu que yá taba nel llugar. Inmovilizáu col collarín y la tabla de rescate estrayéronlu del interior del coche.
