La 2 y Clan TV van emitir dende esti llunes una programación especial de cinco hores diaries de conteníos educativos. Ye una iniciativa empobinada a alumnos y alumnes de 6 a 16 años que pretende facilitar l’aprendizaxe mientres la suspensión d’actividá lectiva presencial. Esta iniciativa ta dirixida especialmente a los estudiantes de families socialmente más vulnerables y qu’escarecen de recursos pa siguir les actividaes on-line qu’apurre la mayoría de los centros educativos y los sos docentes. Tamién a quien viven en territorios con mayores dificultaes de conexón a la rede.
«El Ministeriu d’Educación y Formación Profesional ta trabayando pa que nengún alumnu pierda’l cursu por esta situación escepcional que tamos viviendo», aseguró la ministra. Isabel Celaá agradeció l’esfuerciu de los docentes y recuerda al alumnáu la importancia de caltener mientres esti tiempu’l vezu d’estudiu y l’esfuerzu personal. «Ye imprescindible nun xenerar más ansiedá nes families nin nos alumnos de la que yá provoca la situación de confinamientu», sorrayó.
La nueva parrilla
Clan TV va emitir los llunes espacios con conteníos de Matemátiques, los martes de Ciencies Sociales, los miércoles d’Educación Artística y Educación Física, los xueves de Lengua Castellana ya idiomes y los vienres de Ciencies Naturales. Estos programes van tar dirixíos a neños y neñes d’ente 6 y 8 años na franxa horaria de 9:00 a 10:00 hores; a alumnáu de 8 a 10 años ente les 10:00 y les 11:00 hores y a estudiantes de 10 a 12 años na siguiente hora.
Coles mesmes, en La 2, los estudiantes de 12 a 14 años van poder esfrutar d’estos conteníos, afechos a la so edá, y nel mesmu orde de materies per día de la selmana que nos casos anteriores, ente les 12:00 y les 13:00 hores; y los de 14 a 16 años.
El Ministeriu d’Educación y Formación Profesional cuntó cola collaboración de 14 editoriales y nueve portales educativos qu’ufiertaron los sos conteníos de manera desinteresada. El departamentu que dirixe Isabel Celaá estima bien especialmente esta amplia respuesta y espera que se produzan nueves incorporaciones nos próximos díes. «Ye una amuesa más del compromisu que tol ámbitu educativu ta demostrando mientres esta situación escepcional y de la necesaria aportación de toos pa salir alantre».
