El conseyu d’alministración de la Compañía pa la Xestión de Borrafes Sólides d’Asturies (Cogersa), presidíu pola conseyera de Transición Ecolóxica, Industria y Desenvolvimientu Económicu, Nieves Roqueñí, alcordó güei asumir el serviciu de recoyida separada de borrafes, que dende 2014 venía emprestando la empresa valenciana Vareser 96, S.L.
Esta decisión soluciona definitivamente la crisis que se produció’l pasáu marzu, cuando la empresa cesó na recoyida de los contenedores soterraos de toa Asturies pa forzar el resolvimientu del contratu.
D’equí p’arriba ábrese un periodu d’unos trés meses nel que los servicios técnicos de Cogersa van encetar la planificación y xestión de los asuntos xurídicos (llaborales y alministrativos), operativos y económicos que van conducir a la integración definitiva de la loxística acomuñada a los contenedores azules, verdes y mariellos, ensin la intermediación d’una empresa collaboradora.
L’alcuerdu supón que la plantiya asignada al contratu per parte de Vareser, que suma cerca d’un centenar de trabayadores de distintes categoríes, va pasar a integrase na sociedá pública, al traviés de la vía de la subrogación. Cogersa tamién va adquirir los recursos materiales, esencialmente camiones de diversos formatos (compactadores, de caxa abierta, de carga mista, etcétera).
Roqueñí destacó que, con esta decisión, los y les trabayadores de la contrata van tener un empléu de mayor calidá y seguridá llaboral. “Cogersa va facese col control integral de la calidá y la eficiencia d’un serviciu fundamental pa los conceyos y para la ciudadanía”, señaló la conseyera.
“Tamos optando pola fórmula que nos dará la oportunidá de modernizar ya impulsar la recoyida separada de los conceyos, una xera que ye un elementu esencial de l’aportación de Cogersa a la economía circular n’Asturies”, añedió la presidenta del consorciu. La titular de Transición Ecolóxica tamién esplicó que nesti procesu de tresformamientu incluyiráse la dixitalización del serviciu, que va dexar aumentar la so eficacia en términos económicos y ambientales.
El serviciu de recoyida separada de Cogersa inclúi anguaño la xestión loxística diaria de casi 17.000 contenedores azules, mariellos y verdes, que los sos materiales -envases clasificaos n’orixe- recuéyense y trespórtense hasta les plantes de clasificación de Serín con una flota d’una trentena de camiones entamaos en 44 rutes distintes.
A lo llargo d’esti añu, el consorciu procesó cerca de 45.000 tonelaes de papel/cartón, envases llixeros (llates, cartones de lleche, recipientes de plásticu) y botes y botelles de vidriu, toes elles recibíes al traviés d’esti serviciu.
