El Consorciu pa la Xestión de Borrafes Sólides d’Asturies (Cogersa) va proponer recuperar la tarifa de 67 euros per tonelada qu’aplicaba en 2023 a los conceyos pola recoyida de les borrafes municipales entemecíes (bolsa negra). La conseyera de Transición Ecolóxica, Industria y Desenvolvimientu Económicu y presidenta del consorciu, Nieves Roqueñí, anunció na Xunta Xeneral esta midida, que dexaría temporalmente ensin efectu la xubida aplicada anguaño tres la quema que se produció’l 24 d’abril na nueva planta de tratamientu de basura bruta.
“Voi proponer a la xunta de gobiernu de Cogersa, que se va axuntar a finales de xunu, el cambéu de la tarifa de la fracción resto de 96 a 67 euros per tonelada, con efectos a partir del 1 de mayu”, destacó Roqueñí mientres la so comparecencia parlamentaria.
Al so xuiciu, esta decisión ye “xusta”, yá que se desconoz cuándo volverá tar operativa la planta, y porque la xubida de les tarifes anguaño respondía precisamente al aumentu de los costos operativos pola entrada en funcionamientu de les nueves instalaciones de tratamientu.
La conseyera tamién anunció que se va realizar una auditoría integral sobre les midíes activu y pasivu de detección y estinción de quemes nel complexu de Serín, “pa tratar d’evitar riesgos y tar preparaos” énte sucesos como’l que se produció’l pasáu abril.
Al respective de les causes y circunstancies de la quema, rellató que s’empecipió na zona de descarga d’avolumaos de la nave A y que s’identificó “el llugar esactu onde se xeneró’l fueu”. Nesti sentíu, informó de qu’esiste una grabación d’una cámara de seguridá qu’amuesa los primeros minutos del espardimientu.
“Lo que nun s’identificó hasta’l momentu ye la causa concreta qu’empecipió’l fueu, un asuntu qu’investiga la Policía Xudicial de la Guardia Civil pa refugar intencionalidad”, precisó.
