La plataforma de movilidá CONECTA, que dexa viaxar per Asturies en tresporte públicu ensin llende por un máximu de 30 euros al mes, sumó 31.258.905 validaciones dende la so entrada a valir va agora dos años, el 1 de setiembre de 2022. La tarxeta cunta con más de 210.000 usuarios, lo que supón que más del 20% de la población se beneficia d’esta iniciativa, promovida pol Gobiernu d’Asturies dientro del so apueste estratéxicu pola movilidá sostenible. A partir de mañana, va ser l’únicu títulu operativu del Consorciu de Tresportes d’Asturies al esgotase l’usu del Bono 10, tal como s’anunciara en xunu.
CONECTA, qu’empezó a funcionar como tarifa plana y agora fai como tarxeta monederu, mereció una gran acoyida, tal que revelen los datos. Nos sos dos primeros años de vida rexistráronse 1.058.074 recargues que traxeron unos ingresos de más de 15,2 millones pa cofinanciar el sistema de tresporte públicu. El pasáu xunetu más del 93% de les validaciones realizáronse cola tarxeta, que foi utilizada pol 62% de los viaxeros de rutes interurbanes.
Otru datu destacable ye’l perfil d’edá de los sos titulares: unu de cada trés tien menos de 30 años, lo qu’apunta a la creación de vezos d’usu del tresporte públicu en desterciu del vehículu particular ente los más nuevos. Amás, de mano de la tarxeta’l númberu de viaxeros del CTA repicó hasta algamar los 14,9 millones l’añu pasáu, yá con valores previos a la pandemia.
El Gobiernu d’Asturies trabaya na ampliación de la cartera de servicios de la plataforma, que se convirtió nuna referencia nacional. Asina, una vegada que Renfe s’integre nel conseyu d’alministración del CTA, CONECTA va incorporar l’accesu a les cercaníes ferroviaries. Tamién ta previsto que la tarxeta pueda ser válida pa pagar nes rutes del consorciu que tean operaes por taxis.
