El programa electoral de Convocatoria por Asturies, la coalición ente Izquierda Xunida, Más país Asturies ya Izquierda Asturiana (IAS) inclúi de nuevo la reclamación d’oficialidá pa les llingües d’Asturies. La coalición fala de la necesidá d’un nuevu Estatutu d’Autonomía «que cunte con un ampliu consensu políticu y social, que sirva d’elementu que dea puxu pa dexar tras años de decadencia, que permita blindar los drechos sociales conquistaos y asitie a la llingua asturiana nel llugar que-y correspuende», esplica’l programa.
Pa la coalición d’izquierdes esti Estatutu ha consagrar por fin «la oficialidá de la llingua asturiana, y de la fala o gallego-asturianu nel so ámbitu territorial, mesmo pa garantizar el caltenimientu d’unu de los más importantes patrimonios culturales de los que gociamos, que pa reconocer los drechos llingüísticos de los sos falantes».
El programa axunta otres midíes alredor del asturianu, como la idea de «promover un alcuerdu nos medios públicos de comunicación social, y sobre manera na RTPA, pa espublizar na nuesa llingua la cultura, hestoria, patrimoniu y mediu natural, n’horarios de máxima audiencia, incluyendo conteníos empobinaos al públicu infantil y xuvenil y conteníos deportivos y xeneralistes», asina como’l compromisu de «Garantizar l’afitamientu xurídicu-alministrativa y la suficiencia financiera de l’Academia de la Llingua Asturiana pa garantizar el plenu desenvolvimientu de les sos funciones».
Convocatoria por Asturies comprométese a «aprobar un Plan de Normalización toponímica por aciu alcuerdos con toles alministraciones, incluyíes les estatales, de tala manera que tola señalética de los llugares figure col nome normalizáu», asina como a «impulsar les asignatures de Llingua Asturiana, mesmo en Primaria que n’Educación Secundaria Obligatoria», añadiendo tamién el proyectu p’ampliar «l’usu del asturianu como llingua vehicular na enseñanza a tolos niveles».
