El conseyu d’alministración del Consorciu pa la Xestión de Residuos Sólidos d’Asturies (Coxersa) alcordó asumir na so totalidá’l sobrecostu de la recoyida y tratamientu de los residuos hospitalarios. Estos residuos se cuadruplicaronse ente la pandemia provocada pol coronavirus. El coste d’esta midida estímase en 100.000 euros mensuales, mientres dure la crisis sanitaria. La previsión de residuos hospitalarios pa esti mes ye de 135.483, un 307 % más.
El consorciu recueye los residuos hospitalarios de forma regular na rede sanitaria pública y los sos establecimientos collaboradores dende 1993. Esti serviciu empecipió simultáneamente a la centralización de la xestión de les refugayes hospitalaries nun únicu fornu incinerador de borrafes peligroses.
Coxersa triplicó’l personal de recoyida a trés conductores y camiones diarios, frente a un conductor y un camión qu’efectúen esti llabor en circunstancies normales. Tamién s’ampliaron les hores de funcionamientu del fornu d’incineración d’estos residuos, que pasaron de 104 a 168 selmanales. D’esta manera, asegúrase la eliminación del material baxo rigoroses midíes de seguridá y salú pa los trabayadores y la redolada.
Ampliación del vertideru
La comisión delegada del consorciu aprobó’l proyectu d’ampliación del vertideru actual de residuos non peligrosos, allugáu nes instalaciones de Serín. El proyectu cunta con una inversión de 5.858.132 euros y un plazu d’execución de dolce meses. L’empiezu de les obres, que pretenden enllargar la vida útil del vertideru, prevése pal branu. Los trabayos van consistir nun recrecíu de la instalación actual sobre una superficie de 16 hectárees, con una capacidá d’almacenamientu adicional de 2,1 millones de metros cúbicos.
Ente les actuaciones previstes destaca’l selláu del vertideru primitivu, que va convertise asina nun importante elementu de seguridá adicional. Les obres tán recoyíes nel Plan Estratéxicu de Residuos del Principáu 2017-2024.
