El Consorciu pa la Xestión de les Borrafes Sólides d’Asturies (Coxersa) va empecipiar en septiembre la fase de pruebes de la planta de tratamientu de la fracción resto, allugada en Serín (Xixón) y la so inversión final va superar los 62 millones. La empresa axudicataria del contratu, Valtalia, desenvolvió la obra ensin mayores inconvenientes, magar la escasez puntual de dellos materiales y al impactu de la xubida de precios, polo que los trabayos tán na so recta final.
Nes próximes selmanes, van concluyir los remates nel edificiu alministrativu, l’allugamientu de portones en naves de procesu, la enerxización de motores y la instalación de paneles fotovoltaicos nes cubiertes y los biofiltros.
Les estimaciones de Coxersa apunten a qu’en xineru de 2024 va empezar a clasificase nesti equipamientu tola basura entemecida, de forma que’l vertideru reciba a partir d’entós namás el material de refuga de la planta.
Pal periodu de puesta en marcha y primer esplotación de la planta, que se va estender hasta finales del próximu añu, Coxersa va empecipiar un procesu de selección y contratación, al traviés de Tragsa, de 48 persones de distintos perfiles: xefatura de planta, un alministrativu o alministrativa, dos capataces, 22 oficiales de distintes especialidaes y 22 peones.
Una vegada rematáu’l periodu transitoriu y algamáu el ritmu de producción esperáu, podrá determinase la plantiya estable, anque se calcula que va superar les 60 persones. Los consumibles y suministros esternos de recambios, amás de los servicios especializaos necesarios pal so correctu funcionamientu, tamién se van concretar nesi momentu.
El Plan Estratéxicu de Borrafes del Principáu (PERPA), aprobáu n’abril de 2018, afitaba como principal inversión a executar por Coxersa la construcción d’una planta pa la valorización de la fracción entemecida de les borrafes municipales y de les borrafes industriales non peligrosos. La nueva infraestructura, clave p’algamar los oxetivos de reciclaxe qu’establez la Unión Europea, axudicáu en marzu de 2019. Tres la redacción del proyectu técnicu y l’otorgamientu de les preceptives autorizaciones y llicencies, les obres empecipiaron en xunetu de 2021, con un plazu d’execución de 31 meses.
La recuperación de materiales na nueva planta, tales como fierru, aluminiu, distintos tipos de plásticos, papel-cartón o vidriu, va dexar dar un impulsu significativu a les tases de reciclaxe n’Asturies.
