Profesores ensin plaza y places ensin profesor. Esa ye la situación que se vive n’Asturies nesti momentu según la CSI. Tolos martes, la Conseyería d’Educación publica les places que ye necesario cubrir, tanto n’Educación Primaria como n’Educación Secundaria. Y tolos xueves, cuando dende esta Conseyería s’espublicen les axudicaciones, vese que dalgunes de les places nun cunten con un profesor o profesora que les ocupe.
Llingua Asturiana y Gallego-Asturianu nun son los únicos casos nos qu’asocede, ye una situación que se repite n’otres especialidaes como Llingua Castellana en Secundaria. Sicasí, estes materies sí son los casos más llaceriantes, yá que’l profesoráu de dambes asignatures cunta con menos derechos que’l restu de los trabayadores de la educación asturiana. Al nun esistir la especialidá docente, tampoco nun esiste la posibilidá de presentase a oposiciones. Entós, les condiciones d’esti profesoráu son peores que les del restu. Ye un grupu de trabayadores con menos derechos que los sos compañeros y compañeres.
Esta última selmana, trés places de Llingua Asturiana en Secundaria quedaron ensin cubrir. «Y esta nun ye la esceición, sinón la norma dende qu’entamara’l cursu», denuncien dende la CSI. «Repítese lo mesmo en Primaria y en Secundaria, repítese lo mesmo en Llingua Asturiana y en Gallego-Asturianu. Toles selmanes un fenómenu idénticu dende setiembre», añeden.
Dende CSI Educación esixen a la Conseyería d’Educación que busque dalguna fórmula pa poner solución a esta situación. «Namás cola aprobación de la especialidá vamos ver los derechos del profesoráu de les nuestres llingües propies n’igualdá col restu; pero, hasta que la aprueben (lo que yá tendría que tar fecho va cuantayá), necesitamos dalguna midida que permita acabar col problema», reclamen.
