La Conseyeria de Cultura, Política Llingüística y Turismu presentó esti xueves na Mesa del Horru los resultaos d’un trabayu realizáu a lo llargo del 2020 que se concreta na configuración de la primer base de datos unificada del conxuntu d’horros, paneres y cabazos protexíos n’Asturies. Amás, l’organismu patrimonial empecipió’l debate sobre’l cambéu de la normativa que regula estos elementos etnográficos cola mira de completar y aprobar la parte técnica que, ente otros aspectos, ta venceyada a los sos posibles usos nuevos.
La base de datos unificada cifra en 14.566 los horros, paneres y cabazos protexíos al traviés de la so inclusión nos catálogos urbanísticos municipales. Esti trabayu constituye’l primer aproximamientu solvente y rigoroso pa conocer el númberu d’estos elementos etnográficos n’Asturies. El fechu de que dellos conceyos entá nun realizaren el llabor de catalogación del so patrimoniu nesti campu va incrementar ensin dulda esti censu.
Per otra parte, na xunta de la Mesa del Horru, presidida pola conseyera Berta Piñán, presentóse un borrador yá avanzáu pal empiezu del cambéu normativu que regula esti patrimoniu etnográficu y que tiende a facilitar usos nuevos n’horros y paneres con protección parcial, cola mira de favorecer la so reutilización y la so utilidá. Estos usos alternativos a los tradicionales habrán respetar los valores culturales del elementu etnográficu y favorecer el so caltenimientu.
Amás, el cambéu normativu que plantega la conseyería dexaría reducir notoriamente los trámites d’autorización pa obres de caltenimientu que caltengan les característiques orixinales d’horros y paneres. El borrador propón tamién qu’estes actuaciones puedan ser autorizaes directamente poles alministraciones locales, ensin necesidá d’un informe específicu de Patrimoniu Cultural, siempre que s’afaigan a una serie d’indicaciones que se van recoyer na mesma normativa.
Nel alcuentru, Piñán tamién informó sobre la puesta en marcha d’una iniciativa que va dexar depositar nun almacén habilitáu pola Fundación Cetemas pieces procedentes d’horros y paneres desmontaos de resultes de declaraciones de ruina, derrumbes o otros accidentes, que se van poner de forma gratuita a disposición d’interesaos n’aprovechar estes pieces na restauración d’otros elementos etnográficos de naturaleza similar.
La Mesa del Horru, promovida pola Conseyería de Cultura, Política Llingüística y Turismu en febreru del 2020, ta integrada por espertos, profesionales y representantes d’asociaciones y entidaes de distintos ámbitos rellacionaos col estudiu, la restauración y el caltenimientu d’esti patrimoniu etnográficu.
