La Conseyería de Cultura, Política Llingüística y Deporte promueve la llegada a Asturies del espectáculu Lota, les muyeres del carbón, que se va representar el domingu, 15 de febreru, a les 19:00 hores, nel Auditoriu Teodoro Cuesta de Mieres del Camín. La función, con entrada llibre hasta completar aforu, ye un reconocimientu a la memoria minera compartida ente Asturies y Chile y a los venceyos históricos y culturales construyíos alredor del carbón.
La obra ta dirixida pol coreógrafu y bailaor chilenu Pedro Fernández Embrujo, y toma como puntu de partida’l zarru de les mines de carbón de Lota, nel sur de Chile, pa construyir un relatu escénicu qu’afonda nes repercusiones sociales y humanes del fin de l’actividá estractiva. La propuesta asitia a les muyeres nel centru de la vida comunitaria y sorraya la so función decisiva nel sostenimientu de les families, la organización colectiva y la preservación de la memoria.
El montaxe combina danza folclórica chilena y española, flamencu, teatru y música en direuto. Tamién incorpora lletres de la cantautora Violeta Parra. El resultáu ye una esperiencia escénica integral qu’entrellaza tradición y contemporaneidá y que plantega un diálogu ente distintos llinguaxes artísticos pa reflexonar sobre la identidá, el trabayu y la tresformación de los territorios industriales.
La escoyeta de Mieres refuerza’l calter simbólicu del proyectu. Tanto en Lota como n’Asturies, la minería definió mientres décades la estructura económica, social y cultural del territoriu, y la so desapaición dexó güelgues fondes que siguen presentes na memoria colectiva y nos procesos de transición industrial.
La obra cuenta col patrociniu de la Conseyería de Cultura, la Fundación Chile-España, el sofitu de la Embaxada de Chile n’España y la collaboración del Conceyu de Mieres. La iniciativa enmárcase nes polítiques d’impulsu a la creación contemporánea y de puesta en valor de la memoria industrial y social que desendolca’l Gobiernu d’Asturies.
