La Conseyería de Cultura, Política Llingüísitca y Turismu punxo en marcha na so páxina web https://politicallinguistica.asturias.es/ buscadores que dexen acceder a la toponimia oficial aprobada hasta agora y a un catálogu bibliográficu de les obres publicaes n’asturianu y eonviegu de más recién.
La ferramienta dixital de Política Llingüística incluye información sobre les actividaes qu’impulsa la dirección xeneral y les novedaes sobre los servicios de normalización llingüística, convocatoria d’ayudes, Xunta Asesora de Toponimia y Conseyu Asesor de Política Llingüística, amás de los asuntos al respective d’Educación.
La web tien tamién una sección de gallego-asturianu onde, amás d’acceder a delles informaciones, puen descargase publicaciones editaes nesta llingua pol Gobiernu d’Asturies.
Nel buscador del Catálogu bibliográficu, puen atopase toles obres publicaes n’asturianu y en gallego-asturianu nes últimes cuatro décades. Les busques puen facese por delles categoríes: autor, añu de publicación, editorial, llingua o xéneru lliterariu.
Nel Buscador de Toponimia puen alcontrase les formes oficializaes hasta agora. Puen facese busques por conceyos, parroquies y localidaes, tanto dende les denominaciones yá oficializaes como dende les denominaciones anteriores. Hai que recordar que la Xunta Asesora de Toponimia ocupóse hasta la fecha d’emitir dictame sobre los nomes tradicionales de los 78 conceyos, de les sos capitales, les sos parroquies y los sos núcleos de población, y que’l Gobiernu d’Asturies yá aprobó la oficialización d’estos nomes de población pa 68 conceyos, depués de que les respectives corporaciones dieren el preste a los dictámenes correspondientes. L’últimu conceyu que vio aprobada la toponimia oficial foi’l de Pravia, nel mes de febreru pasáu.
