La Conseyería de Cultura, Política Llingüísitica y Deporte celebró güei la primer xunta de la Mesa del Deporte practicáu por Muyeres, un foru dende’l que se van sentar les bases pa ellaborar un plan con acciones empobináu a fomentar la igualdá nel deporte y na práctica de l’actividá física. El primer pasu va ser la ellaboración d’un estudiu qu’analice la situación del deporte practicáu por muyeres n’Asturies, tantu a nivel profesional como amateur, col fin de cuntar con una radiografía sobre’l so estáu, que detecte les necesidaes y demandes, y dexe diseñar midíes eficaces p’atendeles al traviés d’un futuru plan estratéxicu.
La conseyera, Vanessa Gutiérrez, presidió la xunta, celebrada en Llaboral Ciudá de la Cultura, en Xixón, onde señaló que promover la participación de les muyeres nel deporte, destacar los llogros de les deportistes asturianes en tolos niveles y trabayar p’algamar la igualdá efectiva son les pilastres de la nueva mesa sectorial. Nel alcuentru tamién participó la directora xeneral d’Actividá Física y Deporte, Manuela Fernández.
La mesa ta integrada por representantes de clubes representativos del deporte femenín asturianu, tantu d’equipos como de deportes individuales; deportistes, entrenadores, juezas y árbitres, ente otres.
Tres poner en valor que la igualdá ye unu de los principios rectores de la Llei 5/2022, de 29 de xunu, d’Actividá Física y Deporte, la conseyera anunció una serie d’acciones que se van desenvolver nos próximos meses col fin de sofitar a los clubes femeninos y a les deportistes, como por casu, la ellaboración d’un documentu de bones práctiques empobináu a dar visibilidá al deporte practicáu por muyeres, con acciones comunicatives basaes nel respetu, el rigor y con perspectiva de xéneru.
Gutiérrez anunció tamién la firma de dos convenios formativos de collaboración cola Asociación del Deporte Español: unu denomináu Altu rendimientu dixital, dixitalización del deporte español, coles mires de desenvolver a les profesionales del deporte, y Rede líderes, que busca capacitar a muyeres por que sían dirixentes deportives y multiplicadoras en cuestiones de deportes y xéneru.
