L’actual viceconseyería de Cultura, Política Llingüística y Deporte recuperará la categoría de Conseyería tres la decisión del Comité Autonómicu de la FSA-PSOE d’esta tarde. Sumará amás les competencies de Derechos Sociales y Bientar, hasta agora nuna conseyería propia. L’hasta agora conseyera de Derechos Sociales y Bientar, Melania Álvarez, convertiráse en senadora por designación autonómica, nel llugar que va dexar l’ex conseyeru Enrique Fernández, agora presidente d’Hunosa. Vanessa Gutiérrez asumirá agora les competencies d’esta macroconseyería inédita.
La decisión de rebaxar el rangu de Cultura y Política Llingüística al entamu de la llexislatura, que’l presidente Barbón xustificó al ponela embaxo la so responsabilidá directa, xeneró abondoses crítiques nel mundu cultural y de defensa del asturianu. Con esta operación de remocique del gobiernu podría llibrar nesta cuestión.
El cambiu de postura al respective del asturianu del PP d’Asturies, col nuevu presidente de la formación, Álvaro Queipo, que vistió l’Academia de la Llingua Asturiana y fixo declaraciones a favor del idioma, pel momentu ensin llegar a la oficialidá, supón tamién un elementu que pue ayudar a esplicar esti nuevu movimientu d’Adrián Barbón, faciendo por garrar la delantera nel discursu asturianista.
