El Principáu invierte 6,8 millones pa reparar los daños de les envernaes nes carreteres

L’agua cayío nel mes d’avientu provocó yá 10 emerxencies cuantificaes en más de 450. 000 euros

0
773

La Conseyería d’Infraestructures estima en más de 6,8 millones la inversión destinada a reparar los 90 daños causaos poles envernaes na carreteres en 2019. Los desperfectos fueron aumentando a lo llargo del añu por cuenta de los intensos episodios d’agua de los últimos meses. Asina, a les 52 actuaciones acometíes por emerxencia ente xineru y setiembre d’esti añu, con una inversión total de 4.231.377 euros, súmase a les 38 derivaes de los episodios d’agua y nieve del mes d’ochobre y de payares, cuantificadas en 2.726.140 euros.

Tocántenes al mes d’avientu, el mal tiempu provocó yá 10 emerxencies, cuantificaes en más de 450.000 euros. Les afecciones fueron especialmente intenses na zona central d’Asturies y nel suroccidente, onde foi mester, ente otres actuaciones, cortar dos díes la carretera AS-17 al altor de Tarna, y viéronse afectaes víes como’l Fonduveigas y Pozu de las Muyeres Muertas, o l’AS-213 nel puertu de Ḷḷeitariegos y l’AS-15 al altor de Tebongo.

La directora xeneral d’Infraestructures, Esther Díaz, facilitó estos datos na so visita a les obres d’arreglu del fundimientu que se produció a finales del mes de payares nel puntu kilométricu 3,620 de la carretera AS-337, que xune Sotrondio y Figareo, al altor del núcleu de Perabales, nel conceyu de Samartín del Rei Aurelio; y qu’obligó a cortar la carretera dos selmanes.

Díaz punxo esta actuación como exemplu del “importante esfuerzu económicu que tamos realizando dende la conseyería pa solucionar los daños lo antes posible”. “Toles incidencies que cumplen los requisitos normativos tramítense pol procedimientu d’emerxencia p’asina actuar cola mayor dilixencia y el restu vamos solucionlo atendiendo a la nuesa capacidá operativa y presupuestario” destacó la directora.

Les obres d’esta actuación, presupuestada en 90.000 euros, consisten na execución d’un muriu de formigón de sostenimientu, de 15 metros de llargor y 3,5 metros d’altor mediu d’alzáu; la meyora del drenaxe y la reconstrucción del firme. Los trabayos van rematase cola instalación de la barrera de seguridá y col pintáu de les marques viales na zona afectada. Coles mesmes, aprovechóse la ocasión pa realizar una obra de drenaxe nel puntu kilométricu 1,600 d’esta vía, tamién estropiada por una envernada.