El secretariu de Mediu Ambiente, Planificación Territorial y Polítiques LGTBI de la FSA-PSOE, Álvaro Valle, llamentó “l’actitú homófoba” que tuvo la vocera del PP en Balmonte, Carmen Martínez, en llamando “pedazo maricón” nuna rede social al secretariu xeneral de la UXT, Pepe Álvarez.
“El PP n’Asturies demuestra, una vegada más, ser un partíu homófobu”, señaló’l secretariu de Polítiques LGTBI de la FSA-PSOE. En relación cola rotura de los pactos rexonales ente PP y la ultraderecha, por iniciativa de Vox, Valle remarcó que “si’l PP quier desmarcase de les polítiques homófobes de la estrema derecha, Álvaro Queipo tien de cesar a la vocera municipal del PP en Balmonte y romper los sos pactos con Vox nos conceyos d’Amieva, Castrillón y Tinéu”.
“Queipo nun s’atreve a romper cola estrema derecha porque’l PP cada vegada se paez más a Vox”, afirmó. Coles mesmes, Valle fixo fincapié na invisibilidá y violencia institucional que’l PP demostró nes últimes selmanes n’Asturies a les reivindicaciones LGTBI, llegando a votar en contra de la declaración institucional LGTBI en Xixón”. “El PP de Queipo avérase cada vez más a la ultraderecha homófoba, faciendo una política basada nel insultu”, sentenció.
En referencia al insultu homófobu de la vocera del PP en Balmonte, Valle quixo “tresmitir tol sofitu de la FSA-PSOE a Pepe Álvarez” y “nuesa más firme condena a cualquier tipu de comentariu homófobu”.
