La Conseyería de Derechos Sociales y Bienestar va aumentar l’añu que vien hasta un 75 % les prestaciones económiques vinculaes a la dependencia, concretamente les cantidaes asociaes a les places de residencies de mayores y centros de día, amás de les vinculaes a la promoción de la figura del asistente personal.
La conseyera Melania Álvarez presentó güei en Meres (Siero) el proyectu de presupuestos del so departamentu pal 2022, que xube a 482.696.210 euros, 15 millones más que nel 2021, y onde se contempla una mengua de 24 millones na partida destinada al salariu social de resultes de la entrada en vigor del ingresu mínimu vital.
“Centraos en garantizar la plena efectividá del doble derechu que tienen les persones beneficiaries, caltenemos un esfuerciu inversor de 58 millones, 24 menos que nel 2021, pa facer frente a les prestaciones económiques, de la que doblamos los esfuercios na dinamización de les midíes d’incorporación llaboral. Paeznos qu’estes son les meyores recetes pa sofitar a quien s’atopen nuna situación de vulnerabilidá económica y social especial”, destacó Álvarez.
El fortalecimientu de les polítiques sociales refléxase tamién na puesta en marcha d’una llinia de sofitu a la natalidá con ayudes directes de mil euros por nacencia o adopción, a la que van poder optar les cases que nun superen los 45.000 euros de renta. Derechos Sociales calcula qu’alredor del 82 % de los contribuyentes van tener la posibilidá d’acoyese a esta ayuda.
Otra manera, Álvarez anunció l’adecuación d’un espaciu anguaño en desusu nel Centru Residencial y de Sofitu a la Integración La Arboleya, en Siero, que xestiona la Fundación Asturiana d’Atención y Protección a Persones con Discapacidaes y/o Dependencies (Fasad) y que se va executar l’añu que vien con una inversión de 1,3 millones.
Les cuentes de la Conseyería de Derechos Sociales y Bienestar tamién incluyen una partida de 10 millones del Plan de Recuperación, Tresformación y Resiliencia pa la tresformación del modelu de cuidaos de duración llarga.
“Tamos énte un proyectu de presupuestu con alma, dialogáu y al altor de les necesidaes de la sociedá asturiana”, sorrayó Melania Álvarez.
