El Gobiernu d’Asturies va contactar coles 14.400 families perceptores del salariu social básicu p’actualizar los sos planes individualizaos d’insertamientu social y llaboral. Asina lo anunció güei la conseyera de Derechos Sociales y Bienestar, Melania Álvarez, nel plenu de la Xunta Xeneral.
“El Principáu punxo en marcha a lo llargo d’esta llexislatura numberoses iniciatives pa promover la inclusión social de les persones beneficiaries de la renta mínima autonómica que suponen un saltu cualitativu y cuantitativu na política contra la esclusión social”, valoró la conseyera mientres la so intervención nel Parlamentu.
Álvarez realizó un balance positivu de los datos llograos al traviés d’estes iniciatives, daqué inéditu hasta agora. “Cuntar con datos oxetivos déxanos detectar les debilidaes y les oportunidaes de meyora. Podemos dicir con certidume qu’abargana de 3.000 persones tán participando nos itinerarios d’insertamientu”, detalló.
La conseyera valoró la coordinación ente’l so departamentu, el Serviciu Públicu d’Empléu del Principáu (Sepepa) y los conceyos, al traviés de los centros de servicios sociales municipales, puntos clave pa llograr que el perceptores del salariu social cunten con un programa personalizáu d’incorporación social y llaboral.
Álvarez anunció, amás, la puesta en marcha d’un procedimientu por que quien nun atendieren la llamada telefónica del Sepepa o refugaren participar nes midíes ufiertaes puedan ser citaes de forma presencial polos servicios sociales municipales, col fin d’analizar la so situación y proponer alternatives.
Les llamaes van empezar por aquelles persones qu’aportaren al salariu social básicu nel últimu añu y socesivos.
