El Tsunami Xixón Fest arrasó ayeri cola ciudá. La quinta edición del festival onde se citen dalgunes de les meyores bandes de punk y rock entamó con una xornada onde l’oxetivu yera bien claru: facer homenaxe a tola trayectoria del mayor grupu de punk rock d’Asturies, Desakato.
Dende les 15 hores, la xente empezó, adulces, a enllenar el recintu situáu nel parque Hermanos Castro, sintiendo a grupos que compartieron delles veces escenariu cola banda de Llanera y que, más que compañeros d’oficiu, son amigos. Asina, artistes como Misiva, Mala Reputación o La M.O.D.A. caldiaron l’ambiente hasta que, poco dempués de les 23:30, Desakato salió a facer un conciertu hestóricu pa despidise del so públicu, el d’Asturies.
Tres los primeros acordes y la cayida d’una lona que tapaba por completu l’escenariu, los de Bonielles salieron a dalo too dende’l primer minutu. Durante casi dos hores, ficieron un repasu a la so carrera onde nun faltaron temes que cuantayá nun tocaben, como Fríu de Xineru, unu de los pocos cantares llentos de la banda y que cantó Falu, unu de los componentes orixinales de la banda y que se saliera del grupu va bien d’años.
Desakato nun fueron los únicos que salieron al escenariu. Miembros de la banda Origen, que cubrieron al grupu cuando dalgunu de los componentes nun podía tocar, salieron a tocar un tema, mientres que’l turnu de los cantantes de Misiva y Mala Reputación llegaría poco dempués compartiendo escenariu cola banda.
Hebo tiempu amás non solo pa despidise, sinón tamién pa la reivindicación política y social. Y ye que Desakato siempre intentó posicionase a la escontra de les desigualdaes. Poro, la reclamación de la oficialidá tuvo mui presente mientres les casi dos hores d’actuación, pero tamién el refugu a la llibertá d’espresión que vien de partidos qu’anguaño tan nel poder de la ciudá.
Con too, Desakato despidióse na nueche d’ayeri del so públicu, onde se vivieron momentos de muncha emoción. Tres acabar l’actuación, los componentes del grupu axuntáronse nun abrazu qu’entamaron les dos cares más conocíes de la banda, los hermanos Pablo y Pepo.
Desakato ye yá hestoria de la música asturiana y ayeri pesllaron el so capítulu en tierres asturianes. Desakato ye yá parte de la hestoria del punk-rock.
