Un artículu asoleyáu güei n’El Comercio y que recoyía declaraciones de l’alcaldesa de Xixón, la forista Carmen Moriyón, titulaba «La bandera LGTBI+ no ondeará en el Consistorio porque Xega no lo pidió». La noticia citaba amás a l’alcaldesa afirmando que tuviera un conceyu con XEGA, el colectivu LGTBI+ d’Asturies, va trés meses. La organización reivindicativa ta acabante negar dambes afirmaciones, esplicando que «XEGA nun aconceyó cola alcaldesa Carmen Moriyón dende l’entamu de la so llexislatura».
Dende Xega espliquen que lo afirmao por Moriyón ye «una información falsa dafechu». El cabréu yera considerable esta mañana ente la coordinación del colectivu, que yá veníen llamentando la recién mala noticia de la negativa de los socios de Moriyón, el PP y el conceyal trásfuga que ta nel so equipu, asina como de VOX, a una declaración yá tradicional pa condergar la desigualdá y la violencia exercida contra’l colectivu LGTBI+.
Dende XEGA llamenten que l’alcaldesa «sofite la negativa del Partíu Popular (PP) a sumase a la firma de la declaración y que nun desdixere la posición del so equipu de gobiernu». El PP declaró que nun defende la declración institucional “porque supon un atentáu reprobable contra los derechos de les muyeres». Pa XEGA esto da a entender «que nun conocen la llexislación y la so aplicación, yá que ye un xuez el que tien de refiertar tala declaración y que si nun ye ciertu’l varón cometería fraude de llei, daqué penao pola nuesa llexislación». Per otru llau, dende XEGA, espliquen «desconocemos a qué se refieren con beneficios llegales y xudiciales de les muyeres”.
Per otra parte, espliquen dende XEGA que «la bandera LGTBI+ pue colgase na Casa Conceyu de Xixón, en contra de lo que VOX diz n’otres llocalidaes y como asina afirma’l Tribunal supremu, por propuesta propia del gobiernu de la ciudá y ensin que los colectivos tengan que pidi-ylo», en referencia a les pallabres de Moriyón que califiquen de falsedá.
Aprovechen dende XEGA pa facer un llamáu a salir a la cai’l día 29 a les 18 hores dende’l Paséu de Begoña en Xixón, «pa manifestanos polos nuesos derechos», esclariando a los políticos llocales que «nin ye un desfile, nin una cabalgata, nin una marcha». El colectivu, recuerden «manifiéstase pol Arguyu LGTBI+, contra la LGTBIfobia, contra la discriminación y en pro d’un mundu diversu onde prime “Tolos derechos pa toles persones”.
