L’equipu científicu del Muséu del Xurásicu d’Asturies (MUXA), integráu por Laura Piñuela, Ángel García-Pérez y José Carlos García-Ramos, xunto al investigador Lida Xing, de la Universidá de Xeociencies de China, documentaron pela primer vez n’Asturies rastros de llagartos del Xurásicu, perescasos nel rexistru fósil post-Triásicu. L’artículu que recueye los resultaos de la investigación publicóse en llinia a últimos de febreru d’esti añu na prestixosa revista internacional Ichnos, del Grupo Taylor & Francis. El MUXA ye un equipamientu dependiente de la Conseyería de Cultura, Política Llingüística y Deporte
La investigación trata sobre dos nicios (T1 y T2) que se conserven como relieves abultaos (contramoldes) na base d’un estratu d’arenisca del Xurásicu Superior, con una edá alredor de los 152 millones d’años, procedente de los cantiles al este de la playa d’España (Villaverde, Villaviciosa). Anguaño formen parte de la colección del MUXA y exhíbense na sala del Xurásicu Asturianu.
Les icnites de les manes y de los pies, en dambos rastros, varíen de tetradáctiles a pentadáctiles, son asimétriques y la llonxitú de los deos aumenta progresivamente del I al IV, siendo esti últimu’l más llargu. La so conservación tan escelente y la morfoloxía que presenten estes buelgues dexa atribuyiles a un llagartu y asignales a Rhynchosauriodes. Esti icnoxéneru ampliamente distribuyíu pel Pérmicu y Triásicu, ye perescasu nel Xurásicu, representando los exemplos asturianos la so última apaición nel rexistru fósil global.
El rastru T1 ta formáu por 7 icnites (4 de manos y 3 de pies) y foi producíu por un llagartu d’alredor de 50 cm de llonxitú. El T2 tien 6 icnites (3 de manos y 3 de pies) y ye gracies a un individuu daqué más pequeñu, d’alredor de 30 cm de llargu.
Llama l’atención nel niciu T1 la presencia d’una estructura cuasique continua, ancha, recta, con perpocu relieve y sección en V que delles veces asítiase fuera d’ésti. La morfoloxía d’esta estructura dexa identificala como la marca de la cola qu’en condiciones de desplazamientu normal del llagartu diba asitiase paralela a la llinia media del rastru. Amás, obsérvase que la distancia ente les icnites de les manos y les de los pies varía a lo llargo del rastru, faciéndolu mui irregular.
Pa entender esta anomalía nel desplazamientu, reflexada na irregularidá del niciu, fixéronse dellos esperimentos con dos llagartos actuales, l’oceláu y el barbudu. Les pruebes, non invasives, realizáronse con exemplares en cautividá nun centru de la ciudá de Jiangyin na provincia de Jiangsu (China). Cuando los llagartos actuales, principalmente los exemplares xuveniles, pasaben d’un estáu estáticu a unu en movimientu realizaben xiros bruscos xenerando un rastru asemeyáu al exemplar fósil asturianu.
Los llagartos produxeron estes buelgues de la que se desplazaben per una llamarga semi-consolidada de los deltes de la dómina, los que desembocaben nuna mar interior desprovista de marees y protexida del folaxe tan fuerte por una barrera esterna que la estremaba de la mar abierta, lo que facilitó la conservación de les icnites.
