Los estudiantes de la Universidá d’Uviéu Alberto Antonio Pérez y Silvia Pérez fueron galardonaos nos IX Premios Académicos de AECOC, que reconocen los meyores trabayos de fin de grau y fin de máster nes categoríes de Trade Marketing, Supply Chain, Tecnoloxía Aplicada y Pepsico-Sostenibilidá.
Alberto Antonio Pérez foi galardonáu col primer premiu na categoría de Trade Marketing pol so trabayu fin de máster n’Alministración y Dirección d’Empreses (MADE) “La realidá mista como ferramienta de marketing”, tutorizáu pola profesora de la Facultá d’Economía y Empresa Ana Suárez. El xuráu valoró’l so “interesante aproximamientu al potencial del usu de la realidá mista sobro’l comportamientu de compra, pol rigor del trabayu y pola rápida aplicación qu’estes técniques presenten pal colectivu empresarial”.
Pela so parte, Silvia Pérez foi reconocida col Premiu Especial Carrefour. Nel casu de los premios especiales, ye la mesma empresa quien escueye’l premiáu pa ufierta-y una oportunidá llaboral na organización.
Los IX Premios Académicos de AECOC tienen una dotación económica de 3.000 euros pal autor y 1.000 pal tutor de los trabayos ganadores, y 1.000 euros pa los autores reconocíos con accésit. La convocatoria d’anguaño recibió 200 candidatures.
El xuráu de los IX Premios Académicos de AECOC ta compuestu pol vicepresidente de AECOC, Javier Riolo; el so director xeneral, José María Bonmatí; el director d’Educación y Formación de la CEOE, Juan Carlos Tejeda; el presidente de Rede FOI, Antonio Aracil; el vicepresidente axuntu de CRUE, José Mª Sans; y el presidente de la Comisión Académica de AECOC, Consten Dacosta.
AECOC apueste pola convocatoria de Premios Académicos como parte del so programa Universidá – Empresa puestu en marcha en 2012, que na actualidá cunta con 69 centros universitarios participantes. Coles mesmes, el programa inclúi na actualidá xuna llínea de trabayu en favor de la empleabilidá na que tán collaborando viviegamente más de 80 compañíes del sector.
