Dos persones, un home y una muyer, resultaron mancaes de diversa considerancia nuna quema rexistrada nel primer pisu d’un inmueble de trés altores, allugáu na cai La Estación 8, en Lieres, Siero.
Según los datos facilitaos pol Serviciu d’Atención Médica Urgente (SAMU) el mancáu de mayor considerancia ye un varón, de 50 años, que presentaba quemadures faciales y nes manos amás de sarriu en víes respiratories. Por cuenta de más pruebes y hasta nueva valoración médica’l so pronósticu ye reserváu. Foi atendíu pol equipu médicu de la UVI-móvil de Llangréu y treslladáu al Hospital Universitariu Central d’Asturies (HUCA), n’Uviéu.
A este mesmu hospital foi tresllada, con pronósticu leve, afectada por inhalación de fumu, la otra ferida, una muyer de 87 años. Foi atendida pol equipu d’Atención Primaria de La Pola Siero y treslladada na ambulancia de soporte vital básicu de la zona.
La quema anicióse nun patinete eléctricu asitiáu al llau d’una cama cuando’l so colchón quemó. El fueu quedó confináu nesta habitación del interior d’un pisu asitiáu na primer planta. L’inmueble tenía dos viviendes per planta. El restu de la casa, la caxa d’escaleres y parte del pisu asitiáu xusto enriba, na segunda planta, resultaron afectaos pol fumu.
