Un total de 24.367 persones reciben actualmente atención n’Asturies, 3.284 más que n’avientu del 2019, cuando la conseyería punxo en marcha’l plan de choque nesti ámbitu.
La Conseyería de Drechos Sociales y Bientar cunta algamar anguaño una mengua del 95% de la llista d’espera pa la valoración de les persones con dalgún grau de dependencia. Esti descensu respuende a la puesta en marcha del plan de choque que’l Gobiernu d’Asturies aprobó a últimos del 2019 y qu’agora s’executa na so cuarta y última fase.
La conseyera Melania Álvarez avanzó estes previsiones na Xunta Xeneral, onde presentó un balance global sobre la evolución del sistema de la dependencia n’Asturies de magar empezó’l plan de choque, el primer compromisu qu’adoptó al asumir el cargu.
Depués d’una primer fase d’análisis que se llevó a cabu de setiembre a avientu del 2019, reorganizáronse les xeres y afitáronse oxetivos individuales pa los empleaos públicos. Amás, reforzóse la plantiya nesti ámbitu con 31 persones más, al pasar de 75 a 106, lo que supunxo una inversión de más d’un millón d’euros. “Al mediu plazu consiguimos aforrar duplicidaes y simplificar la tramitación ameyorando les ferramientes informátiques y soscribiendo convenios con entidaes llocales de les árees l, lll y Vlll pa la encomienda de les valoraciones nos sos conceyos”, esplicó Álvarez.
Posteriormente, nel exerciciu 2020, y a pesar de les llimitaciones derivaes de la pandemia sanitaria y del estáu d’alarma, Derechos Sociales menguó la llista d’espera de les valoraciones un 41,5 % y la de persones a la espera de prestación, un 47,7 %. “A pesar de les adversidaes que tuvimos qu’encarar pola mor del coronavirus, agora hai 5.047 persones menos esperando pola so valoración o pol so programa individual d’atención. Siempre diximos que somos un Gobiernu que nun se conforma”, amestó la conseyera.
De magar se punxo en marcha’l plan de choque, n’avientu del 2019, y hasta febreru del 2021, el númberu de persones dependientes que reciben asistencia pasó de 21.083 a 24.367.
La cuarta y última fase d’esi plan céntrase en modificar la normativa sobre’l procedimientu y les prestaciones de la dependencia. “El marcu nuevu va ayudar de manera decisiva a la meyora del sistema, porque se basa n’evidencies y ellaboróse baxo una única óptica: la de facilitar l’exerciciu de los sos derechos a les persones dependientes y a les sos families”, aseguró la titular de Drechos Sociales.
